DOHA — Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa gaaray magaalada Dooxa ee dalka Qatar, halkaas oo uu kaga qeyb-galayo Madasha Dooxa oo diiradda lagu saarayo arrimaha amniga, siyaasadda iyo iskaashiga horumarineed ee caalamka.
Madaxweynaha ayaa lagu soo dhaweeyay garoonka Hamad International Airport, waxaana qaabilay mas’uuliyiin sare oo ka tirsan Dowladda Qatar. Booqashadan ayaa qeyb ka ah dadaallada socda ee lagu xoojinayo xiriirka laba-geesoodka ah iyo iskaashiga istiraatiijiga ah ee Soomaaliya iyo Qatar.
Inta uu joogo Dooxa, Madaxweyne Xasan Sheekh ayaa kulammo gaar ah la yeelan doona Amiirka Qatar, Sheekh Tamiim Binu Xamad, iyo mas’uuliyiin kale oo sar-sare. Labada dhinac ayaa ka wada hadli doona xaaladda gobolka, amniga, xiriirka labada dal iyo sidii loo ballaarin lahaa iskaashiga dhaqaale, siyaasadeed iyo midka horumarineed.
Ka qeyb-galka wafdiga Soomaaliya ee Madasha Dooxa ayaa loo arkaa fursad muhiim ah oo lagu soo bandhigayo doorka diblumaasiyadeed ee Soomaaliya, lana xoojinayo wada-hadallada caalamiga ah ee ku saabsan amniga iyo mustaqbalka guud ee gobolka Geeska Afrika.
