MUQDISHO, Soomaaliya — Midowga Golayaasha Culimada Soomaaliyeed ayaa dowladda ugu baaqay inay joojiso tallaabo kasta oo lagu duudsinayo muwaadiniinta xuquuqdooda milkiyadeed, xilli ay isa soo tarayaan cabashooyinka la xiriira dhulalka iyo guryaha laga duminayo qaybo ka mid ah Muqdisho.
Culimadu waxay kulan ku yeesheen Muqdisho, iyagoo ka hadlay cabashooyin ay sheegeen inay uga yimaadeen bulshada oo ku saabsan murannada dhulka iyo guryaha, gaar ahaan hantida ay leeyihiin dad haysta dukumiintiyo milkiyadeed oo ay ku tilmaameen kuwo sharci ah.
Waxay sheegeen in qaar ka mid ah muwaadiniinta laga qaaday ama lagu murmay hantidooda, halka qaar kalena lagu soo rogay lacago aysan sheegin inay leeyihiin saldhig sharci oo cad.
Midowga ayaa carrabka ku adkeeyay in hantida gaarka ah aan qof looga qaadi karin awood maamul, amar ama cabsi gelin, haddii aan la marin hannaan sharci iyo garsoor oo caddaalad ah.
Culimadu waxay ugu baaqeen Madaxweynaha Soomaaliya Xasan Sheekh Maxamuud, Ra’iisul Wasaare Xamse Cabdi Barre, maamulka Gobolka Banaadir iyo hay’adaha ay arrintu khuseyso inay si madax-bannaan u baaraan cabashooyinka, ilaaliyaan xuquuqda shacabka, isla markaana lala xisaabtamo cid kasta oo lagu helo ku takrifal awoodeed, boob hantiyeed ama musuqmaasuq.
Waxay sidoo kale garsoorka ugu baaqeen inuu si madax-bannaan oo caddaalad ah uga shaqeeyo khilaafaadka dhulka. Ganacsatada, nootaayooyinka iyo dilaaliinta hantidana waxay uga digeen inay ku lug yeeshaan hanti lagu helay dulmi ama xaq-darro.
Midowga Golayaasha Culimada Soomaaliyeed ayaa sheegay in haddii cabashooyinka taagan aan si degdeg ah wax looga qaban, ay qaadi doonaan tallaabooyin kale oo ay u arkaan inay ku habboon yihiin xaaladda.
