Riyadd – Mas’uul ka tirsan Sacuudi Carabiya ayaa sheegay in weerarro ay Xuutiyiinta Yemen ku qaadeen gudaha boqortooyada ay ku dhaawacmeen 73 qof oo rayid ah, oo ay ku jiraan haween iyo carruur. Afhayeen u hadlay isbahaysiga uu hoggaamiyo Sacuudiga ayaa sheegay in Xuutiyiintu ay bartilmaameedsadeen goobo ay dad rayid ah ku sugnaayeen oo ku yaalla magaalooyinka Abha, Khamis Mushait, Jazan iyo Najran.
Sacuudi Carabiya ayaa Xuutiyiinta Yemen ku eedeysay inay weerarro ku qaadeen goobo rayid iyo kuwo dhaqaale oo ku yaalla boqortooyada, taasoo sababtay dhaawaca ugu yaraan 73 qof.
Eedeyntan ayaa timid maalintii Talaadada, xilli uu sii xoogeysanayay dagaalka ka socda Yemen, halkaas oo dowladda uu caalamku aqoonsan yahay, ee ay taageerto Sacuudi Carabiya, ay billowday hawlgal milateri oo looga hortagayo weerarrada Xuutiyiinta, isla markaana dib loogu qabsanayo dhul ay kooxdaasi maamusho.
Sarreeye Guuto Turki al-Maliki, oo ah afhayeenka isbahaysiga uu hoggaamiyo Sacuudiga ee ka dagaallama Yemen, ayaa bayaan uu soo saaray ku sheegay in weerarrada Xuutiyiintu ay beegsadeen goobo rayid iyo kuwo dhaqaale oo ku yaalla gobollada Abha, Khamis Mushait, Jazan iyo Najran.
Al-Maliki ma uusan carrabaabin xilliga ay weerarradu dhaceen. Wuxuu weerarrada ku tilmaamay “koror khatar ah” iyo “xadgudub cad” oo lagu sameeyay madax-bannaanida Sacuudiga, isagoo uga digay inay khatar toos ah ku yihiin muwaadiniinta iyo dadka ku nool boqortooyada.
Wuxuu sheegay in isbahaysigu uu qaadi doono “tallaabooyin hawlgal oo lagama maarmaan ah” si uu uga hortago weerarradaas, isla markaana uu tallaabo ka qaado ilaha khatartaas. Ma jirin wax jawaab degdeg ah oo ka soo baxday dhinaca Xuutiyiinta.
Ka hor intaas, Xuutiyiintu waxay Sacuudiga ku eedeeyeen inuu duqeyn dhinaca cirka ah ka fuliyay xabsi ku yaalla al-Hazm, oo ku yaalla waqooyiga gobolka al-Jawf, halkaas oo ay ku dhinteen ugu yaraan toddobo qof. Kooxdu waxay sheegtay in “gardarrada joogtada ah ee Sacuudiga uu ku hayo Yemen aanay noqon doonin mid aan ciqaab lahayn”.
Yemen ayaa ku jirtay colaad tan iyo markii Xuutiyiintu ay la wareegeen caasimadda Sanca sannadkii 2014-kii, taasoo keentay in isbahaysi uu hoggaamiyo Sacuudigu uu faragelin milateri sameeyo sannadkii xigay. Dagaalkii u dhexeeyay labada dhinac ayaa inta badan istaagay kaddib heshiis xabbad-joojin ah oo ay garwadeen ka ahayd Qaramada Midoobay sannadkii 2022-kii, balse wuxuu dib u billowday kaddib dagaalkii ay Mareykanka iyo Israa’iil ku qaadeen Iran.
Colaadda ayaa dib u bilaabatay bishii Luulyo, markii Xuutiyiintu ay gantaallo iyo diyaarado aan duuliye lahayn ku weerareen Garoonka Caalamiga ah ee Abha ee Sacuudi Carabiya, taasoo ka dhalatay weerar lagu qaaday garoonka diyaaradaha ee Sanca.
Dhamaadkii isla bishaas, Xuutiyiintu waxay ku dhawaaqeen xayiraad dhanka badda ah oo ay saareen Sacuudi Carabiya, waxayna bilaabeen inay bartilmaameedsadaan maraakiibta xiriirka la leh Sacuudiga ee ku sugan Badda Cas.
Maalintii Khamiista, Xuutiyiintu waxay qaadeen weerar ballaaran, iyagoo isku dayaya inay horumar ka sameeyaan galbeedka Taiz iyo koonfurta Hodeidah, kuna sii jeeda magaalada dekedda leh ee al-Makha iyo marinka Bab al-Mandeb ee Badda Cas.
Dagaalku markii hore wuxuu ka socday galbeedka Taiz iyo koonfurta Hodeidah, balse hadda wuxuu ku faafay gobollada al-Dhalea, Marib, al-Jawf iyo al-Bayda, iyadoo dowladda ay doonayso inay kala firdhiso ciidamada Xuutiyiinta oo ay cadaadis dheeraad ah saarto kooxda.
Ururka Caafimaadka Adduunka (WHO) ayaa sheegay in ku dhowaad 1,078 qof ay dhinteen ama ku dhaawacmeen tan iyo 24-kii Agoosto, halka in ka badan 21,000 oo qofna ay barakaceen tan iyo maalintii Khamiista.
