MUQDISHO, Soomaaliya [SMN] – Shirka Golaha Wadatashiga Qaranka (GWQ), oo markii hore lagu waday inuu ka furmo magaalada Muqdisho Khamiista, ayaa dib loo dhigay ilaa Isniinta, May 5, kaddib wadatashi dhexmary madaxda qaranka.
War-saxaafadeed ka soo baxay Xafiiska Ra’iisul Wasaaraha Xukuumadda Federaalka Soomaaliya, Xamse Cabdi Barre, ayaa lagu sheegay in go’aanka dib-u-dhigista uu ahaa mid ay si wadajir ah u gaareen madaxda, inkastoo aan si faahfaahsan loo sheegin sababta rasmiga ah ee keentay dib-u-dhigista.
Si kastaba ha ahaatee, ilo xog-ogaal ah ayaa sheegay in Dowladda Federaalka ay wado dadaallo ay ku doonayso inay dib ugu soo celiso miiska wada-hadalka madaxda dowlad-goboleedyada qaar oo horey uga fogaaday geeddi-socodka GWQ. Maqnaanshaha Puntland iyo Jubbaland shirarkii ugu dambeeyay ee GWQ ayaa muujiyay kala fogaansho siyaasadeed oo sii xoogeysanaya.
Horraantii bishan, Puntland ayaa mar kale ku celisay mowqifkeeda ah inay ka baaqsatay shirarka, iyadoo ku eedeysay dowladda federaalka inay ka leexatay dastuurka iyo inay ka tagtay hannaanka sharciga ah.
Dib-u-dhigista shirkan ayaa imaneysa xilli cadaadis xooggan uu ka imanayo beesha caalamka, oo ku baaqaysa in madaxda Soomaaliyeed ay si degdeg ah isugu yimaadaan si ay uga heshiiyaan arrimaha muhiimka ah. Wadamada deeq-bixiyeyaasha ah ayaa dalbanaya go’aanno mideysan oo cad oo ku saabsan dib-u-habeynta siyaasadeed, dastuuriga iyo doorashooyinka si loo kordhiyo taageerada iyo isku-duwidda caalamiga ah.
Golaha Wadatashiga Qaranka waa madasha ugu sarreysa ee siyaasadeed ee Soomaaliya, oo isu keenta hoggaanka dowladda federaalka iyo madaxweynayaasha dowlad-goboleedyada si loo dejiyo jihada dalka ee la xiriirta maamulka, doorashooyinka, iyo amniga.
