Muqdisho — Guddoomiyaha Hay’adda Maareynta Musiibooyinka Qaranka (SoDMA), Maxamuud Macallin Cabdulle, ayaa kulan la yeeshay Agaasimaha Gurmadka Degdegga ah ee Hay’adda Cuntada iyo Beeraha ee Qaramada Midoobay (FAO), Rein Paulsen, Wakiilka FAO ee Soomaaliya, Etienne Peterschmitt, iyo wakiillo ka socday Dowladda Norway.
Kulanka ayaa diiradda lagu saaray xoojinta iskaashiga u-diyaargarowga El Niño, nidaamyada digniinaha hore iyo tallaabooyinka degdegga ah ee looga hortagayo saameynta musiibooyinka. Intii uu kulanku socday, waxaa laga wada hadlay sidii digniinaha hore loogu xiriirin lahaa tallaabooyin degdeg ah oo isku-duuban, si loo badbaadiyo nolosha dadka, loo ilaaliyo hab-nololeedka bulshada, loona yareeyo saameynta fatahaadaha iyo khataraha kale ee la xiriira El Niño.
Sidoo kale, kulanka ayaa lagu adkeeyay muhiimadda ay leedahay abaabulka dhaqaale iyo helitaanka taageero dheeraad ah oo wax looga qabanayo baahiyaha bani’aadantinimo ee taagan. Waxaa sidoo kale la xusay baahida loo qabo maalgelin muddo dheer ah oo lagu xoojinayo u-diyaargarowga musiibooyinka, yareynta khataraha iyo dhismaha adkeysiga bulshada. Ugu dambeyn, Guddoomiyaha SoDMA, Maxamuud Macallin Cabdulle, ayaa xaqiijiyay sida ay hay’addu uga go’an tahay hoggaaminta dadaallada dowladda ee maareynta khataraha.
