MUQDISHO, Soomaaliya — Hay’adda Maareynta Musiibooyinka Soomaaliyeed (SoDMA) iyo Hay’adda Cunnada Adduunka ee Qaramada Midoobay (WFP) ayaa kala saxiixday heshiis iskaashi oo soconaya muddo laba sano ah, kaas oo lagu xoojinayo awoodda Soomaaliya ee diyaar-garowga iyo ka jawaabista musiibooyinka.
Guddoomiyaha SoDMA Maxamuud Macallim Cabdulle iyo Madaxa WFP Soomaaliya Hameed Nuru ayaa kala saxiixday heshiiska, kaas oo diiradda lagu saarayo saadaalinta khataraha, diyaar-garowga, digniinta hore, tallaabada hore iyo ka jawaabista xaaladaha degdegga ah.
Heshiiska ayaa sidoo kale taageeraya xoojinta nidaamka maareynta khataraha musiibooyinka, sugnaanta cunnada, gargaarka bani’aadannimo iyo adkeysiga bulshada, si loo yareeyo saameynta musiibooyinka loona ilaaliyo nolosha iyo nolol-maalmeedka dadka Soomaaliyeed.
Hameed Nuru ayaa sheegay in heshiisku uu xoojinayo iskaashiga SoDMA iyo WFP, isla markaana uu gacan ka geysanayo dhismaha nidaam maareynta musiibooyinka oo awood u leh inuu si degdeg ah uga jawaabo khataraha bani’aadannimo iyo saameynta isbeddelka cimilada.
Guddoomiyaha SoDMA Maxamuud Macallim Cabdulle ayaa dhankiisa sheegay in iskaashigu uu muhiim u yahay xoojinta diyaar-garowga qaranka iyo awoodda hay’adaha Soomaaliyeed ee ka jawaabista musiibooyinka.
Wuxuu sheegay in mudnaanta la siin doono digniinta hore iyo tallaabada hore, isagoo WFP uga mahadceliyay taageerada joogtada ah ee ay siiso Soomaaliya.
