MUQDISHO, Soomaaliya — Wasiirka Arrimaha Dibadda iyo Iskaashiga Caalamiga ee Soomaaliya, Cabdisalaan Cabdi Cali “Dhaay”, ayaa ka guddoomay nuqullada waraaqaha aqoonsiga afar safiir oo cusub oo loo soo magacaabay Soomaaliya, sida ay sheegtay Wasaaradda Arrimaha Dibadda.
Safiirrada cusub ayaa kala ah Dr. Madou Diallo oo ah safiirka Mali, Danlami Ibrahim oo ka socda Nigeria, Aqsa Nawaz oo ka socota Pakistan iyo Aung Min oo matalaya Myanmar.
Gudbinta nuqullada waraaqaha aqoonsiga ayaa si rasmi ah u astaynaysa bilowga waajibaadka diblomaasiyadeed ee safiirrada cusub, kadib markii Dowladda Federaalka Soomaaliya ay ansixisay magacaabistooda.
Wasiir Cabdisalaan ayaa soo dhaweeyay safiirrada cusub, isaga oo caddeeyay sida ay dowladda uga go’an tahay xoojinta xiriirrada laba geesoodka ah iyo ballaarinta iskaashiga ay la leedahay dalalka ay safiirradu matalaan.
Wasaaradda Arrimaha Dibadda ayaa sheegtay in Soomaaliya ay doonayso inay sii xoojiso xiriirkeeda diblomaasiyadeed, siyaasadeed iyo dhaqaale ee ay la leedahay dalalka caalamka.
Safiirrada cusub ayaa la filayaa inay ka shaqeeyaan horumarinta xiriirka Soomaaliya iyo dalalkooda, gaar ahaan dhinacyada iskaashiga siyaasadda, dhaqaalaha, horumarka iyo danaha labada dhinac.
