WASHINGTON — Hadallo uu jeediyay Madaxweynaha Maraykanka Donald Trump oo lagu sheegay kuwo aflagaado iyo naceyb u badan ayaa caro iyo muran xooggan ka dhaliyay bulshada Soomaaliyeed ee ku nool dalkaas, kuwaas oo arrintan ku tilmaamay weerar ba’an oo ka dhan ah sharafkooda iyo doorkooda muwaadinimo.
Hadallada, oo lagu faafiyay baraha bulshada iyo warbaahinta qaarkeed, ayaa sheegay in Trump uu Soomaalida ku tilmaamay “qashin” isla markaana uu ku eedeeyay in ay ka soo jeedaan “goob aan waxba oolin oo haddana cabasho badan.” Waxa kale oo lasoo sheegay in uu ku adkeystay in dadka Soomaaliyeed “dib ugu noqdaan dalkooda oo ay hagaajiyaan.”
Inkasta oo hadalladan aan si madax-bannaan loo xaqiijin, haddana bulshada Soomaaliyeed ee Maraykanka ayaa muujiyay cabsi iyo caro, iyaga oo sheegay in ay u arkaan weerar guud oo lagu beegsanayo bulsho qaxooti hore u soo martay dhibaatooyin badan.
Wararka la faafiyay ayaa sidoo kale sheegay in Trump uu aflagaadeeyay Xildhibaan Ilhaan Cumar oo laga soo doorto Minnesota, isaga oo ku tilmaamay “qashin,” taas oo ay taageerayaasheeda ku sifeeyeen weerar toos ah oo ka dhan ah haweeney Soomaali ah oo muddo ku dhow 25 sano muwaadin ka ahayd dalkaas.
Afhayeenka Ilhaan Cumar, Jacklyn Rogers, ayaa hore u sheegtay in xildhibaanaddu ay u aragto weerarrada Trump “kuwo ka tarjumaya xaalad caafimaad-darro oo uu qabo,” isla markaana ay rajeynayso “in uu helo gargaar uu u baahan yahay.”
Falcelinta ka dhalatay hadalladan la sheegay ayaa imanaysa xilli maamulka Trump uu wajahayo cadaadisyo badan oo siyaasadeed, oo ay ku jiraan sicir-bararka sii kordhaya iyo su’aalo sharci oo la xiriira duqeymo ka dhacay Caribbean-ka.
Bulshada Soomaaliyeed ee ku nool Maraykanka ayaa dhacdadan ku tilmaamay mid dhaawacaysa sharaftooda iyo doorkooda muhiimka ah ee ay ku leeyihiin dhismaha dalka, iyaga oo ku baaqay in laga hortago nacayb kasta oo ku wajahan qowmiyad ama bulsho gaar ah.
