Ururka Migrare, ayaa si adag u cambaareeyay geerida Abderrahim Fakir, isagoo ku baaqay in caddaalad loo helo iyo in la joojiyo tacaddiyada lagu beegsado bulshooyinka muhaajiriinta.
Ururku wuxuu sheegay in aan la aqbali karin in qof uu geeriyoodo isagoo hortooda jooga shaqaalaha caafimaadka iyo ciidamada ammaanka, kuwaas oo waajibkoodu ahaa inay badbaadiyaan, xilli uu gargaar codsanayay.
Sida lagu sheegay bayaanka, Abderrahim Fakir wuxuu u geeriyooday fal arxan darro ah oo lagula kacay. Geeridiisa ayaa murugo weyn ku reebtay qoyskiisa, saaxiibbadiis iyo dhammaan dadkii yaqaanay.
Ururku wuxuu xusay in muuqaallada laga duubay dhacdada ka dhacday xaafadda Pilastro ee magaalada Bologna ay si weyn u xusuusinayaan dilkii George Floyd ee ka dhacay magaalada Minneapolis sanadkii 2020. Wuxuu sidoo kale dhaliilay qaar ka mid ah siyaasiyiinta oo uu ku eedeeyay inay dhiirrigeliyaan ama marmarsiiyo u sameeyaan rabshadaha halkii ay cambaareyn lahaayeen.
Migrare ayaa ugu baaqay dowladda iyo hay’adaha garsoorka inay sameeyaan baaritaan hufan oo madax-bannaan, isla markaana sharciga la horkeeno cid kasta oo lagu helo inay mas’uul ka tahay geerida Abderrahim Fakir.
Ururku wuxuu ugu dambeyn shacabka ugu baaqay inay taageeraan codsiga saxiixyada lagu dalbanayo caddaaladda, isagoo sheegay in saxiix kasta uu yahay tallaabo loo qaaday xaqiijinta caddaaladda iyo ka hortagga in dhacdooyin la mid ah ay mar kale dhacaan.
Ku biir Ololaha, saxiix Petition-ka
