MUQDISHO – Soomaaliya ayaa gashay marxalad siyaasadeed oo cusub kadib markii ay sii xoogaysteen khilaafaadka la xiriira doorashooyinka iyo muddo-xileedka dowladda federaalka.
Beesha caalamka ayaa bilowday baaqyo ku aaddan in dhinacyada siyaasadda ay dib ugu laabtaan wada-hadal iyo tanaasul si looga hortago xiisad horleh.
Safiirka Midowga Yurub u fadhiya Soomaaliya Francesca Di Mauro ayaa la kulantay Madaxweynaha Soomaaliya Hassan Sheikh Mohamud iyo Madaxweynaha Puntland Saciid Abdullahi Deni, iyadoo sheegtay in labada dhinac ay muujiyeen inay weli diyaar u yihiin wada-hadal siyaasadeed.
“Soomaalida ayaa go’aan ka gaari doonta mustaqbalkooda siyaasadeed. Midowga Yurub, oo ah saaxiib muhiim ah, wuxuu rajeynayaa heshiis siyaasadeed oo loo dhan yahay, laguna kalsoonaan karo,” ayay tiri Danjire Di Mauro.
Danjiraha ayaa sheegtay in Midowga Yurub uu taageersan yahay hannaan siyaasadeed oo loo dhan yahay, laguna gaaro heshiis ay isku raacsan yihiin dhammaan daneeyayaasha siyaasadda Soomaaliya. Waxay sidoo kale carrabka ku adkeysay muhiimadda ay leedahay ilaalinta xasilloonida iyo sii wadidda dowlad-dhiska dalka.
Dhanka kale, danjirihii hore ee Turkiga u fadhiyay Soomaaliya Kâni Torun ayaa ka digay xaaladda siyaasadeed ee dalka kadib 15-ka May, oo uu sheegay inay ku egtahay muddo-xileedkii dastuuriga ahaa ee dowladda hadda jirta. Wuxuu tilmaamay in muranka sharciyeed ee ka dhashay wax-ka-beddelka dastuurka uu sii kordhiyay kala aragti duwanaanta siyaasadeed.
Dr. Torun ayaa soo jeediyay qorshe dhowr qodob ka kooban oo uu sheegay inay xal u noqon karaan xiisadda taagan, kuwaas oo ay kamid yihiin magacaabista ra’iisul wasaare dhexdhexaad ah, dhismaha xukuumad loo dhan yahay, iyo sameynta guddi doorasho oo madax-bannaan. Waxa uu sidoo kale ku baaqay in dhinacyadu ka fogaadaan tallaabooyin hal dhinac ah iyo hadallo sii hurin kara xiisadda.
Hadalladan ayaa kusoo beegmaya xilli wadahadallo hore uga dhacay magaalada Mogadishu ay kusoo dhammaadeen is-afgarad la’aan, iyadoo beesha caalamka ay sii waddo dadaallada lagu doonayo in Soomaaliya ay ku gaarto heshiis siyaasadeed oo xasillooni lagu ilaalinayo.
