ANTALYA, Turkiga – Madaxweynaha Soomaaliya Xasan Sheekh ayaa Khamiistii ka qayb galay shirweynaha 31-aad ee Qaramada Midoobay ee Isbeddelka Cimilada (COP31), oo ka furmay magaalada Antalya ee dalka Turkiga, isaga oo beesha caalamka ugu baaqay inay fuliso ballanqaadyada ku aaddan wax ka qabashada isbeddelka cimilada.
Madaxweynaha ayaa khudbad uu ka jeediyay shirka ku adkeeyay muhiimadda ay leedahay in ballanqaadyada caalamiga ah loo beddelo tallaabooyin wax ku ool ah, gaar ahaan taageerada dalalka sida daran ay u saameeyaan dhibaatooyinka ka dhasha isbeddelka cimilada.
Xasan Sheekh ayaa sheegay in Soomaaliya, inkasta oo ay qayb aad u yar ku leedahay qiiqa hawada wasakheeya ee caalamka, haddana ay ka mid tahay dalalka sida daran ay u saameeyaan abaaraha daba-dheeraada iyo fatahaadaha.
Waxa uu xusay in la joogo xilligii dalalka sida weyn uga masuulka ah isbeddelka cimiladu ay hoggaamin lahaayeen dadaallada lagu yareynayo saameyntiisa, isla markaana ay taageero dhaqaale iyo mid farsamo siiyaan dalalka nugul.
Madaxweynaha ayaa hadalkiisa ku muujiyay baahida loo qabo caddaaladda cimilada, iyadoo dalalka soo koraya ay muddooyinkii dambe ku baaqayeen in dalalka warshadaha horumaray ay qaataan masuuliyad dheeraad ah oo ku aaddan wax ka qabashada dhibaatada, maadaama ay qayb weyn ku leeyihiin qiiqa hawada wasakheeya.
Soomaaliya ayaa sannadihii u dambeeyay wajahaysay abaaro soo noqnoqday iyo fatahaado ba’an, kuwaas oo sababay barakac, burbur hantiyeed iyo inay sii xumaato xaaladda nololeed ee bulshooyin badan, gaar ahaan dadka ku tiirsan beeraha iyo xoolaha.
Isbeddelka roobabka iyo xaaladaha cimilo ee aan la saadaalin karin ayaa sidoo kale kordhiyay nuglaanta dalka, iyadoo saameyntoodu culays dheeraad ah ku yeelatay dadaallada bani’aadannimo iyo horumarinta dalka.
Ka qaybgalka Xasan Sheekh ee COP31 ayaa ku soo beegmaya xilli Soomaaliya ay raadineyso iskaashi caalami ah iyo maalgelin dheeraad ah oo lagu xoojinayo awoodda dalka ee la qabsiga isbeddelka cimilada, ka hortagga musiibooyinka iyo ilaalinta bulshooyinka ay sida daran u saameeyaan abaaraha iyo fatahaadaha.
Shirka COP31 ayaa waxaa ka qaybgalaya madaxda dowladaha, wakiillo ka socda dalalka kala duwan, khubaro ku takhasustay cimilada iyo hay’adaha caalamiga ah, kuwaas oo ka arrinsanaya dhimista qiiqa hawada wasakheeya, la qabsiga isbeddelka cimilada iyo maalgelinta dadaallada lagu wajahayo saameyntiisa.
