MUQDISHO — Guddiga Doorashooyinka Qaranka ee Soomaaliya ayaa shaaca ka qaaday in 20 xisbi siyaasadeed ay si rasmi ah u soo gudbiyeen liisaskooda musharaxiinta ee doorashooyinka golayaasha deegaanka gobolka Banadir.
Guddigu wuxuu xaqiijiyay in habka diiwaangelinta musharaxiinta uu hadda si rasmi ah u soo dhamaaday, kadib markii muddadii la kordhiyay ay ku dhammaatay 10-ka December.
Diiwaangelinta liisaska musharaxiinta ayaa bilaabatay 25-ka November, kadib markii guddigu muddo laba toddobaad ah ku daray waqtigii hore ee loo qorsheeyay.
Sannadkan, wadar ahaan 61 xisbi ayaa isu diiwaangeliyay ka qeybgalka doorashada, laakiin inta badan ayaa ka baxday tartanka. Ugu dambeyntii, 20 xisbi ayaa si guul leh u soo gudbiyay liisaskooda musharaxiinta.
Tani waxay ka dhigan tahay in doorashada golayaasha deegaanka ee Banadir ay hadda ku tartami doonaan tiro kooban oo xisbiyo ah, iyadoo doorashadu lagu qorsheeyay inay dhacdo 25-ka December ee magaalada Muqdisho.
