Addis Ababa – Jamhuuriyadda Federaalka Soomaaliya ayaa loo doortay inay ka mid noqoto Golaha Nabadda iyo Amniga ee Midowga Afrika (PSC) muddada 2026–2028, taasoo ah guul taariikhi ah oo muujinaysa horumarka diblomaasiyadeed ee dalka iyo dib u soo laabashadiisa kaalintii uu ku lahaa arrimaha qaaradda iyo caalamkaba.
Doorashadan waxay ka tarjumaysaa kalsoonida iyo aaminaadda ay dalalka xubnaha ka ah Midowga Afrika u hayaan Soomaaliya.
Wasiirka Arrimaha Dibadda iyo Iskaashiga Caalamiga ah ee Jamhuuriyadda Federaalka Soomaaliya, Mudane Cabdisalaan Cabdi Cali, oo warbaahinta la hadlay kaddib doorashada, ayaa sheegay in Soomaaliya ay si qoto dheer ugu mahadcelinayso dhammaan dalalkii taageeray una codeeyay musharraxnimadeeda.
Wasiirku wuxuu xusay in taageeradan wadajirka ahi ay muujinayso iskaashi xooggan iyo himilo mideysan oo ku aaddan Afrika nabad ah, xasilloon, isla markaana barwaaqo ah. Wuxuu carrabka ku adkeeyay in xubinnimada Golaha Nabadda iyo Amniga ay Soomaaliya u tahay masuuliyad weyn, isla markaana ay mar kale xaqiijinayso go’aankeeda adag ee ku aaddan horumarinta nabadda, amniga, xasilloonida, iyo dhiirrigelinta wadahadal wax-ku-ool ah oo ka hanaqaada guud ahaan qaaradda Afrika.
