Tripoli – Afar qof oo tahriibayaal ah ayaa laga soo badbaadiyay badda Mediterranean-ka kadib in ka badan shan maalmood oo ay ku jireen xaalad adag, kaddib markii doon ay la socdeen ay ku degtay xeebaha bariga dalka Liibiya.
Sida ay sheegeen ilo amni oo ka tirsan dalka Liibiya iyo Hay’adda Socdaalka Adduunka (IOM), ugu yaraan 10 qof ayaa la xaqiijiyay inay ku dhinteen shilkaas, halka 31 kalena la la’yahay, iyadoo weli ay socdaan dadaallo baadi-goob iyo samatabbixin ah.
Musiibadan ayaa ka dhacday agagaarka magaalada Tobruk, halkaas oo lix mayd laga helay xeebta Sabtidii kadib markii ay hirarku soo tuureen.
Hay’adda IOM ayaa sheegtay in kooxaha gurmadka ay sii wadaan raadinta dadka la la’yahay, inkastoo ay jiraan caqabado la xiriira xaaladaha badda iyo helitaanka agab ku filan oo samatabbixin ah.
Wararka ayaa sidoo kale tilmaamaya in dadka saarnaa doonta ay u badnaayeen muhaajiriin ka soo jeeda Masar iyo Suudaan, kuwaas oo isku dayayay inay si sharci darro ah ugu gudbaan qaaradda Yurub.
Dhacdadan ayaa mar kale muujinaysa halista sii kordheysa ee safarada tahriibka, iyadoo Liibiya ay weli tahay marin muhiim ah oo ay isticmaalaan dadka doonaya inay gaaraan Yurub. Qaramada Midoobay ayaa hore u sheegtay in in ka badan 900,000 oo muhaajiriin ah ay ku sugan yihiin gudaha dalkaas, kuwaas oo wajahaya xaalado nololeed oo aad u adag.
Musiibooyinka noocan ah ee soo noqnoqda ayaa sii kordhinaya walaaca caalamiga ah ee ku saabsan badqabka muhaajiriinta iyo baahida loo qabo xal waara oo lagula tacaalo tahriibka sharci darrada ah.
