Muqdisho – Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa ubax dhigay Taallada Dhagaxtuur ee magaalada Muqdisho, isagoo maamuusay halyeeyadii Soomaaliyeed ee naftooda u huray halgankii gobannimo-doonka iyo xorriyadda dalka.
Munaasabadda ubax dhigga ayaa qeyb ka ahayd dabaaldegga 66-guurada kasoo wareegtay maalintii gobollada Waqooyi ee Soomaaliya ay xornimada qaateen, 26-kii Juun 1960, oo ahayd maalintii ugu horreysay ee calanka Soomaaliyeed ee xor ah laga taago dalka.
Madaxweyne Xasan Sheekh Maxamuud ayaa xusay in halgankii gobannimo-doonka uu saldhig u ahaa dhismaha dowladnimada Soomaaliyeed, isagoo ku baaqay in la ilaaliyo midnimada, wadajirka iyo qiyamka ay u soo halgameen halyeeyadii dalka.
Munaasabadda ayaa qayb ka ah toddobaadka xorriyadda Soomaaliyeed, oo sanad walba lagu xuso dhacdooyinkii taariikhiga ahaa ee horseeday gobannimada iyo mideyntii Jamhuuriyadda Soomaaliyeed.
Xuska 26-ka Juun ayaa lagu maamuusaa guud ahaan dalka, iyadoo lagu xasuusto halgankii gobannimo-doonka iyo doorkii ay halyeeyadii Soomaaliyeed ka qaateen xaqiijinta xorriyadda iyo madaxbannaanida Soomaaliya.
