Burkina Faso, Niger iyo Mali ayaa dib u bilaabay wadahadalladii ay la lahaayeen urur-goboleedka Galbeedka Afrika ee ECOWAS, iyagoo ku heshiiyey in la dhiso kooxo shaqo oo wadajir ah si loo diyaariyo heshiis qaab-dhismeed oo qeexaya iskaashiga labada dhinac.
Dib u bilaabashada wadahadalladan ayaa ku soo aadaysa xilli xiriirka saddexdan dal ee gobolka Sahel iyo ECOWAS uu muddo ku jiray khilaaf siyaasadeed, kaddib markii ay go’aansadeen inay ka baxaan ururka, isla markaana ay dhistaan isbahaysi u gaar ah oo ay ku mideysan yihiin.
Burkina Faso, Niger iyo Mali ayaa si rasmi ah uga baxay Ururka Dhaqaalaha Dalalka Galbeedka Afrika (ECOWAS) bishii Janaayo 2025, kaddib markii ay sameysteen Isbahaysiga Dalalka Sahel (AES), kaas oo ay u arkaan hannaan ay ku xoojin karaan wadajirkooda iyo madax-bannaanida go’aannadooda siyaasadeed.
Wadahadallada u dhexeeya ECOWAS iyo AES ayaa socday tan iyo bishii Janaayo 2025, balse kulankii Sabtidii dhacay ayaa ahaa kii ugu horreeyey ee rasmi ah oo heer wasiirro ah. Tallaabadan ayaa muujinaysa in labada dhinac ay doonayaan inay sii wadaan xiriirka, inkastoo ay jiraan kala aragti duwanaansho siyaasadeed.
Bayaanka wadajirka ah ee la soo saaray fiidnimadii Sabtida ayaa lagu sheegay in labada dhinac ay soo dhaweeyeen ruuxa walaaltinimada, ixtiraamka labada dhinac iyo furfurnaanta lagu wajahay wadahadallada. Waxay sidoo kale carrabka ku adkeeyeen muhiimadda ilaalinta xiriirka deris-wanaagga, iyadoo la ixtiraamayo madax-bannaanida dal kasta.
Labada dhinac ayaa isku raacay in la dhiso kooxo shaqo oo wadajir ah, kuwaas oo loo xilsaari doono inay ka wada hadlaan arrimo gaar ah, si loo diyaariyo heshiis qaab-dhismeed oo saldhig u noqda iskaashiga mustaqbalka.
Heshiiskan la qorsheynayo ayaa noqonaya tallaabo lagu doonayo in lagu qeexo qaabka ay ECOWAS iyo saddexda dal ee AES u wada shaqeyn karaan, kaddib markii ay soo kala dhexgaleen khilaafaad horseeday kala fogaansho siyaasadeed. Hase yeeshee, bayaanka wadajirka ah laguma sheegin jadwalka lagu dhammaystirayo heshiiska ama muddada ay qaadan doonaan wadaxaajoodyada kooxaha shaqada.
Wafdiga Isbahaysiga Dalalka Sahel waxaa hoggaaminayey Karamoko Jean-Marie Traore, oo ah wasiirka arrimaha dibadda ee Burkina Faso, halka wafdiga ECOWAS uu hoggaaminayey Cheikh Niang, wasiirka arrimaha dibadda ee Senegal.
