MUQDISHO, Soomaaliya — Wasiiru-dowlaha Wasaaradda Gaashaandhigga Soomaaliya Cumar Cali Cabdi ayaa sheegay in dowladda federaalka ay ka warqabto howlgallo milatari iyo duqeymo ka dhacay xeebaha Puntland.
Cumar Cali Cabdi oo si kooban warbaahinta ugu hadlay Muqdisho ayaa sheegay in haddii howlgallada milatari ee ka dhanka ah kooxaha burcad-badeedda laga fulinayo xeebaha Soomaaliya, dowladda federaalka ay tahay hay’adda sharci ahaan u xilsaaran oggolaanshaha howlgallada noocaas ah.
Wasiiru-dowlaha ayaa sheegay in dowladda ay diyaarinayso warbixin dhameystiran oo ku saabsan dhacdooyinka ka dhacay xeebaha, isagoo xusay in tallaabooyin laga qaadi doono xaaladda sii kordheysa.
“Warbixin dhameystiran ayaa la soo gudbin doonaa,” ayuu yiri Wasiiru-dowlaha Gaashaandhigga.
Hadalladiisa ayaa yimid saacado kadib markii maamulka Puntland uu dalbaday in wax laga weydiiyo duqeymo ay sheegeen in maraakiib dagaal oo caalami ah oo aan la magacaabin ay ka fuliyeen xeebaha Puntland 18-kii iyo 20-kii Agoosto.
Puntland ayaa sheegtay in duqeymahaasi ay beegsadeen kalluumeysato ayna waxyeello u geysteen hanti rayid.
Wasaaradda Amniga iyo DDR-ta Puntland ayaa Sabtidii bayaan ay soo saartay ku muujisay walaac ku saabsan khasaaraha ay keeni karaan howlgallada milatari ee ka socda deegaanka Garmaal, oo ku dhow goobo xeebeed lagu hayo maraakiib la sheegay in burcad-badeeddu afduubteen.
Wasaaraddu waxay sheegtay in duqeymaha ay dhaawici karaan iskaashiga u dhexeeya hay’adaha amniga Puntland iyo saaxiibada caalamka ee ka shaqeeya la-dagaallanka burcad-badeedda.
Waxay sidoo kale ka digtay in howlgallada noocan ah ay waxyeello u geysan karaan dadka rayidka ah ee aan ku lug lahayn falalka burcad-badeednimada.
Dhacdadan ayaa ku soo beegmaysa kaddib markii Khamiistii lagu aasay deegaanka xeebta ah ee Garmaal, gobolka Nugaal, afar nin oo looga shakisan yahay burcad-badeednimo, kuwaas oo la sheegay in lagu dilay duqeyn loo aaneynayo Turkiga.
Ragga ayaa la sheegay inay dhinteen kaddib markii weerar lagu qaaday doon yar oo ay saarnaayeen dad lala xiriirinayo afduubka markab ganacsi.
Qoysaska ragga dhintay ayaa Turkiga ku eedeeyay inuu ka dambeeyay duqeynta, hase yeeshee dowladda Turkiga weli si rasmi ah ugama hadlin wararka sheegaya in howlgalku dhacay.
Dhacdooyinka ayaa kusoo beegmaya xilli ay xeebaha Soomaaliya dib uga soo cusboonaadeen falal burcad-badeednimo, iyadoo dhowr markab oo ganacsi la afduubtay bilihii u dambeeyay.
Dowladda federaalka iyo maamulka Puntland ayaa labaduba wajahaya cadaadis sii kordhaya oo ku aaddan sidii looga hortagi lahaa burcad-badeedda, iyadoo sidoo kale la ilaalinayo badqabka kalluumeysatada iyo dadka kale ee rayidka ah ee ku nool deegaannada xeebaha.
