New York – Golaha Ammaanka ee Qaramada Midoobay ayaa la filayaa inuu yeesho kulan gaar ah oo looga hadlayo xaaladda Soomaaliya, gaar ahaan mustaqbalka Hawlgalka Midowga Afrika ee Taageerada iyo Xasilinta Soomaaliya (AUSSOM), xilli ay sii kordhayaan walaacyada la xiriira dhaqaale-yaraanta iyo hubanti la’aanta taageerada caalamiga ah ee howlgalka.
Kulanka ayaa lagu soo bandhigi doonaa warbixinno ku saabsan xaaladda amniga Soomaaliya, howlaha AUSSOM iyo taageerada saadka ee ay Qaramada Midoobay siiso ciidamada Midowga Afrika iyo kuwa ammaanka Soomaaliya.
Waxaa la filayaa inay warbixinno ka jeediyaan Kaaliyaha Xoghayaha Guud ee Qaramada Midoobay u qaabilsan Afrika ee Waaxaha Arrimaha Siyaasadda iyo Dhisidda Nabadda iyo Hawlgallada Nabadda (DPPA-DPO), Martin Kimani, iyo Ergayga Gaarka ah ee Guddoomiyaha Midowga Afrika u qaabilsan Soomaaliya, ahna Madaxa AUSSOM, El Hadji Ibrahima Diene.
Sidoo kale, Golaha Ammaanka ayaa dhageysan doona warbixin ku saabsan shaqada Guddiga Cunaqabataynta Al-Shabaab, oo loo yaqaan Guddiga 2713. Dalka Latvia oo haya guddoomiyenimada Golaha Ammaanka bisha Nofeembar ayaa la filayaa inuu soo bandhigo warbixinta la xiriirta arrimaha guddiyada hoose.
Kulankan ayaa kusoo aadaya xilli ay jiraan walaacyo sii kordhaya oo ku saabsan mustaqbalka AUSSOM iyo taageerada saadka ee Xafiiska Taageerada Qaramada Midoobay ee Soomaaliya (UNSOS), kaas oo door muhiim ah ka qaata sahayda iyo taageerada ciidamada ka howlgala Soomaaliya.
Warbixintii Xoghayaha Guud ee Qaramada Midoobay ee la soo saaray 28-kii Oktoobar ayaa faahfaahin ka bixisay caqabadaha dhaqaale ee saameynaya howlaha UNSOS iyo taageerada ay siiso AUSSOM iyo ciidamada ammaanka Soomaaliya.
UNSOS ayaa kharashaadkeeda dhintay boqolkiiba 25 marka loo eego miisaaniyaddii 2025/2026 oo ahayd 520.6 milyan oo doollar, halka miisaaniyadda sannadka 2026/2027 loo ansixiyay 481.4 milyan oo doollar.
Dhibaatooyinka dhaqaale ayaa sidoo kale saameeyay sanduuqa maalgelinta ee UNSOS, kaas oo taageera ciidamada ammaanka Soomaaliya ee la shaqeeya AUSSOM. Ciidamadaasi waxay u baahan yihiin ku dhowaad 2.2 milyan oo doollar bishii si loo daboolo baahiyahooda saadka.
Yaraanta dhaqaalaha ayaa sababtay in si ku-meel-gaar ah loo hakiyo keenista shidaalka iyo raashinka ciidamada intii u dhexeysay bilihii Maajo iyo Luulyo. Taageerada ayaa dib u bilaabatay kaddib markii dowladda UK ay bishii Agoosto ku deeqday hal milyan oo gini, taas oo u dhiganta qiyaastii 1.4 milyan oo doollar.
UNSOS ayaa sheegtay inay filayso inay sii waddo heerka taageerada ee hadda jira ilaa dhammaadka bisha Diseembar, hase yeeshee Xoghayaha Guud ee Qaramada Midoobay ayaa ka digay in dhaqaale-yaraanta joogtada ahi ay halis gelin karto sii socoshada taageeradaas.
Dhanka kale, dalalka ciidamada ku deeqay howlgalka AUSSOM ayaa shir aan caadi ahayn ku yeeshay magaalada Kampala ee dalka Uganda intii u dhexeysay 29-kii ilaa 31-kii Luulyo, iyagoo ka wada hadlay caqabadaha horyaalla howlgalka.
Shirkaasi ayaa lagu baaqay in AUSSOM uu yeesho ka bixitaan nidaamsan oo marxaladaysan, iyadoo dalalka ciidamada ku deeqay ay dalbadeen in howlgalka la siiyo taageero joogto ah muddo 18 ilaa 24 bilood ah, si loo xoojiyo awoodda hay’adaha amniga Soomaaliya loona fududeeyo wareejinta mas’uuliyadda amniga.




