MUQDISHO – Golaha Mustaqbalka Soomaaliyeed ayaa ansixiyey hannaan doorasho oo cusub, kaas oo looga gol leeyahay in dalka looga saaro marxaladda kala-guurka ah, loona horseedo nidaam doorasho oo xasilloon, loo dhan yahay, hufan, isla markaana leh sharciyad siyaasadeed oo lagu wada qanco.
War-saxaafadeed uu soo saaray Golaha ayaa lagu sheegay in go’aankan uu ku saleysan yahay tanaasul siyaasadeed iyo tixgelinta rabitaanka shacabka Soomaaliyeed, si loo helo hannaan mideeya bulshada, kana qeyb qaata yareynta khilaafaadka la xiriira doorashooyinka.
Golaha ayaa xusay in hannaanka cusub ee loo bixiyay “Transitional Direct Elections Model” uu xaqiijinayo in muwaadiniinta Soomaaliyeed ay si toos ah uga qeyb qaataan doorashada wakiilladooda, iyadoo la ilaalinayo hab-qaybsiga matalaadda ee ku dhisan qaaciddada 4.5.
Sidoo kale, Golaha Mustaqbalka Soomaaliyeed ayaa adkeeyay muhiimadda ay leedahay joogteynta geeddi-socodka doorashooyinka, si loo gaaro natiijooyin waara, sharciyad leh, isla markaana dalka uga gudbiya muddooyinka kala-guurka ee soo jiitamayay.
War-saxaafadeedka ayaa sidoo kale lagu carrabka ku adkeeyay in wada-hadallada siyaasadeed ay yihiin dariiqa ugu habboon ee lagu xallin karo khilaafaadka doorashooyinka iyo arrimaha la xiriira maamulka marxaladda kala-guurka.
Golaha Mustaqbalka Soomaaliyeed ayaa ugu dambeyn ugu baaqay dhammaan saamileyda siyaasadda iyo qaybaha kala duwan ee bulshada inay taageeraan dadaallada lagu dhisayo hannaan doorasho oo mideeya shacabka Soomaaliyeed, kana qeyb qaata xasilloonida iyo horumarka dalka.
