Addis Ababa – Wakaaladda Wararka Itoobiya (ENA) ayaa daabacday maqaal si adag u dhaliilaya siyaasadda arrimaha dibadda ee Madaxweyne Xasan Sheekh Maxamuud, iyadoo ku eedeysay inuu Soomaaliya u jiheeyay dhinac siyaasadeed oo ay Itoobiya u aragto inuu ka hor imaanayo danaha iyo himilooyinka istiraatiijiga ah ee Addis Ababa.
Maqaalka ENA ayaa si gaar ah diiradda u saaray ka qeybgalka Madaxweyne Xasan Sheekh ee shir-madaxeedkii afar geesoodka ahaa ee 4-tii Oktoobar lagu qabtay magaalada New El-Alamein ee dalka Masar, kaas oo ay isugu yimaadeen madaxda Masar, Soomaaliya, Eritrea iyo Suudaan.
Shir-madaxeedka ayaa lagu soo saaray bayaan wadajir ah oo ka hadlay xasilloonida gobolka, madax-bannaanida dowladaha, amniga Badda Cas, la dagaallanka argagixisada iyo iskaashiga dhaqaale. Bayaanka ayaa sidoo kale qodob gaar ah uga hadlay webiyada xuduudaha ka gudba, oo uu ku jiro Webiga Nile, isagoo adkeeyay mabda’a ah “inaan waxyeello la geysan” iyo in tallaabooyinka saameyn kara isticmaalka biyaha dalalka hoose lagu saleeyo ogeysiis hore, wadatashi iyo is-afgarad.
ENA ayaa arrintan ku fasirtay inay qeyb ka tahay isbahaysi siyaasadeed oo ay sheegtay inuu si dadban u xaddidayo danaha Itoobiya ee la xiriira horumarinta dhaqaalaha, Webiga Nile iyo Badda Cas.
Maqaalka ayaa si gaar ah u dhaliilaya taageerada Madaxweyne Xasan Sheekh uu u muujiyay bayaanka, isagoo ku dooday in mowqifka Muqdisho uu ka duwan yahay xiriirkii iyo taageeradii ay Itoobiya muddo dheer la lahayd Soomaaliya. Wakaaladda Wararka Itoobiya ayaa maqaalkeeda ku xustay doorkii Itoobiya ee arrimaha Soomaaliya tan iyo burburkii dowladdii dhexe ee dalka sanadkii 1991.
Waxay ku doodday in Itoobiya ay door ka qaadatay dadaalladii dib-u-heshiisiinta Soomaaliya, iyadoo xustay shirarkii lagu qabtay Sodere iyo Mbagathi iyo kaalintii ay Itoobiya ka qaadatay dadaallada lagu dhisay hay’adihii dowladeed ee Soomaaliya. Sidoo kale, maqaalka ayaa xoogga lagu saaray kaalinta ciidamada Itoobiya ee howlgaladii amniga ee Soomaaliya iyo dagaalladii lala galay Al-Shabaab.
ENA waxay sheegtay in ciidamada Itoobiya ay qeyb ka ahaayeen dadaallo amni oo ay ku jiraan howlgalladii Midowga Afrika ee Soomaaliya, iyadoo xustay AMISOM, ATMIS iyo AUSSOM, isla markaana ku doodday in ciidamada Itoobiya ay door ka qaateen dagaalladii lagu xaqiijinayay amniga magaalooyin iyo deegaano muhiim ah.
Qodobka ugu weyn ee ENA ay dhaliishay ayaa ah qodobka shanaad ee bayaanka El-Alamein, kaas oo khuseeya webiyada xuduudaha ka gudba. Bayaanka ayaa sheegay in afarta dal ay muhiim u arkaan in la ixtiraamo sharciga caalamiga ah ee khuseeya webiyada xuduudaha ka gudba, gaar ahaan Webiga Nile, isla markaana la ilaaliyo mabda’a ah inaan waxyeello loo geysan dalalka kale.
Waxa kale oo bayaanka lagu sheegay in iskaashiga arrimaha biyaha lagu saleeyo ogeysiis hore, wadatashi iyo is-afgarad, iyadoo la diiday tallaabooyin hal dhinac ah oo waxyeello u geysan kara isticmaalka biyaha ee Masar iyo Suudaan oo ah labada dal ee ku yaalla dhanka hoose ee Nile.
