Dhoobley, Jubada Hoose – Ciidamada Booliska ee degmada Dhoobley ee gobolka Jubada Hoose ayaa gacanta ku dhigay koox dhalinyaro ah oo lagu eedeeyay inay qorsheynayeen tahriib sharci-darro ah, xilli dowladda Federaalka Soomaaliya ay xoojisay dagaalka ka dhanka ah shabakadaha dadka ka ganacsada.
Sida ay sheegeen saraakiisha ammaanka, dhalinyaradan oo ka soo safartay magaalada Muqdisho ayaa doonayay inay si dhuumasho ah uga gudbaan xadka Soomaaliya iyo Kenya, si ay halkaas uga sii bilaabaan safar ay ku gaari lahaayeen dalka Liibiya, kahor inta aysan isku dayin inay u gudbaan qaaradda Yurub.
Ciidamada Booliska ayaa dhalinyarada ku qabtay bar-koontarool oo ku taalla waddada laga soo galo magaalada Dhoobley, kadib markii baaritaanno lagu sameeyay gaadiidkii ay saarnaayeen iyo dadka la socday.
Saraakiisha ayaa sheegay in markii hore la hakiyay gaadiidka kadib markii dadka saarnaa ay waayeen dukumiintiyo iyo dammaanad sharci ah oo u saamaxaysa inay magaalada ku galaan. Baaritaanno dheeraad ah oo ay sameeyeen qaybaha dambi-baarista ee booliska ayaa lagu ogaaday in qaar ka mid ah dhalinyaradaasi ay qorsheynayeen inay si sharci-darro ah uga gudbaan xadka Soomaaliya iyo Kenya.
Tallaabadan ayaa kusoo aadeysa xilli dowladda Federaalka Soomaaliya iyo maamullada dowlad-goboleedyadu ay kordhiyeen dadaallada lagu xakameynayo tahriibka dhalinyarada Soomaaliyeed, kuwaas oo marar badan naftooda gelinaya halis si ay u gaaraan dalalka Yurub.
Dadaallada lagu yareynayo tahriibka ayaa sidoo kale la xiriira isbeddellada cusub ee ku yimid nidaamyada socdaalka ee gobolka, iyadoo waddamo badan ay adkeeyeen shuruudaha dal-ku-galka iyo socdaalka si loo xakameeyo marinnada sharci-darrada ah ee loo adeegsado tahriibka.
Taliska Booliska degmada Dhoobley ayaa sheegay inay sii wadi doonaan howlgallada lagu sugayo amniga xuduudaha iyo ka hortagga dhaqdhaqaaqyada sharci-darrada ah, iyagoo xusay in ujeeddadoodu tahay badbaadinta nolosha dhalinyarada Soomaaliyeed iyo la dagaallanka kooxaha ka ganacsada dadka.
Mas’uuliyiinta ammaanka ayaa ugu dambeyn ugu baaqay dhalinyarada Soomaaliyeed inay ka fogaadaan tahriibka, ayna ka taxaddaraan khataraha waaweyn ee ku xeeran safarrada sharci-darrada ah ee ay maamulaan shabakadaha dadka ka ganacsada.
