MUQDISHO, Soomaaliya — Ra’iisul Wasaaraha Xukuumadda Federaalka Soomaaliya, Xamsa Cabdi Barre, ayaa xilka ka qaaday laba xubnood oo ka tirsanaa Golaha Wasiirrada, kuwaas oo kala ahaa Wasiiru Dowlaha Wasaaradda Hawlaha Guud, Dib-u-dhiska iyo Guriyeynta iyo Wasiir Ku-xigeenka Wasaaradda Dekedaha iyo Gaadiidka Badda.
War-saxaafadeed ka soo baxay Xafiiska Ra’iisul Wasaaraha Arbacadii, 4-ta November 2026, ayaa lagu sheegay in xilka laga qaaday Saciid Maxamed Maxamuud, oo ahaa Wasiiru Dowlaha Wasaaradda Hawlaha Guud, Dib-u-dhiska iyo Guriyeynta, iyo Fartuun Cabdiqaadir Faarax, oo ahayd Wasiir Ku-xigeenka Wasaaradda Dekedaha iyo Gaadiidka Badda.
Go’aanka xil-ka-qaadista ayaa yimid kadib markii Ra’iisul Wasaaruhu tixraacay qodobbada 117-aad iyo 120-aad, farqaddiisa labaad, ee Dastuurka Jamhuuriyadda Federaalka Soomaaliya, Xeer-hoosaadka Golaha Wasiirrada iyo shuruucda kale ee dalka.
Sida lagu sheegay war-saxaafadeedka, go’aanka ayaa salka ku haya hannaanka daah-furnaanta, isla xisaabtanka iyo dowlad-wanaagga, iyadoo sidoo kale la tixgeliyey muhiimadda ay leedahay ilaalinta habsami u socodka howlaha labada wasaaradood.
Xafiiska Ra’iisul Wasaaraha ma uusan faahfaahin sababaha gaarka ah ee keenay xil-ka-qaadista labada mas’uul, mana shaacin cidda lagu beddelayo.
Xil-ka-qaadistan ayaa dhaqan gashay markii uu Ra’iisul Wasaaruhu saxiixay go’aanka, iyadoo taariikhda dhaqangalka loo asteeyey 4-ta November 2026.
Tallaabadan ayaa wax ka beddel ku sameyneysa hoggaanka labada wasaaradood ee ka tirsan Xukuumadda Federaalka Soomaaliya.
