Kenya – Ugu yaraan 15 qof ayaa ku dhimatay kadib markii gaari xamuul ah uu isku dhacay gaari yar oo dadweyne ah bartamaha magaalada Nyeri, sida ay boolisku sheegeen. Shilkan ayaa dhacay fiidnimadii Sabtida meel u dhow jaamacad dadweyne oo ku taal wadada Nyeri-Nyahururu.
Elizabeth Vivi, oo ah sarkaalka booliska u qaabilsan ilaalinta taraafikada ee bartamaha Kenya, ayaa sheegtay in gaariga xamuulka ah uu jiiray gaariga dadweynaha markii uu u leexday si uu uga fogaado mooto si taxadar la’aan ah ugu soo biirtay wadada weyn.
Afar qof ayaa isla goobta ku dhintay, halka 14-ka kalena ay dhinteen markii la gaarsiiyay isbitaalka ismaamulka Nyeri. Shan qof oo kale ayaa ku dhaawacmay shilkan waxaana lagu dabiibayaa isbitaallada deegaanka.
Madaxweyne William Ruto ayaa tacsi u diray qoysaska dhibaatadu saameysay, isagoo sheegay in dowladda qaranka ay la shaqeynayso maamulka gobolka Nyeri si ay u siiso taageero dhammaan dadka ay dhibaatadu saameysay.
Shilalkan ayaa ka mid ah kororka guud ee shilalka waddooyinka ee Kenya, iyadoo warbixin dowladeed lagu sheegay in dhimashada shilalka ay sare u kacday ilaa 5,000 qof sanadkii 2025, halka sanadkii kasii horeyay ahayd 4,448.
Dowladdu iyo Hay’adda Ammaanka Qaranka ee Gaadiidka iyo Badbaadada (NTSA) ayaa dhawaan soo saartay ganaaxyo degdeg ah oo lagu xakameynayo xawaaraha iyo xad-gudubyada taraafikada, laakiin tallaabadan ayaa hadda maxkamad la horgeeyay, taasoo ku keentay in ay si ku meel gaar ah uga baxdo. Dacwoodayaashu waxay su’aal ka keeneen waajibaadka NTSA ee ku saabsan soo rogidda ganaaxyada degdegga ah, iyagoo xusay in awoodda noocaas ah ay leedahay garsoorka sida uu qabo sharciga Kenya.
