Garoowe, Soomaaliya – Dowladda Puntland iyo Mareykanka ayaa xaqiijiyay guusha laga gaaray hawlgal ka dhan ah argagixisada oo laga fuliyay buuraha Al-Madow (Golis), kaas oo lagu beegsaday goob ay kooxda Al-Shabaab hub ku kaydsan jirtay oo ku taalla Markad.
War-saxaafadeed kasoo baxay maamulka Puntland ayaa lagu sheegay in hawlgalkan, oo lagu fuliyay iskaashi lala sameeyay mas’uuliyiinta Puntland, lagu bartilmaameedsaday goob ay Al-Shabaab u isticmaali jireen kaydinta hubka iyo rasaasta loogu talagalay in lagu taageero falalka argagixisanimo, laguna khatar geliyo dadka reer Puntland iyo guud ahaan Soomaaliya.
Hawlgalkan ayaa lagu tilmaamay tallaabo kale oo muhiim ah oo laga qaaday ololaha ballaaran ee lagu doonayo in Al-Shabaab looga saaro waqooyiga Soomaaliya. Puntland iyo Mareykanka ayaa, iyagoo beegsanaya kaabayaasha taageera shabakadaha argagixisada, kordhinaya cadaadiska saaran Al-Shabaab, isla markaana wiiqaya awoodda kooxdu u leedahay fulinta howlgalladeeda iyo qorsheynta weerarrada.
Dowladda Puntland iyo Mareykanka ayaa mar kale caddeeyay in hawlgalkani uu qayb ka yahay dadaal joogto ah oo lagu wiiqayo awoodda Al-Shabaab, loogana hortagayo inay helaan goobo ammaan ah, isla markaana lagu taageerayo nabadda iyo xasilloonida muddada dheer ee waqooyiga Soomaaliya.
