Leego, Soomaaliya – Ciidanka Kumaandooska Danab ee Xoogga Dalka Soomaaliyeed, gaar ahaan Ururka 161-aad iyo Cutubka Gaarka ah ee Gawaarida Gaashaaman, ayaa howlgal bur-burin ah ka sameeyey deegaanka Leego ee Gobolka Baay.
Howlgalka ayaa lagu fashiliyey qorshe ay Al-Shabaab doonayeen in ay miinooyin ku aasaan waddooyinka ay isticmaalaan shacabka Soomaaliyeed, gaar ahaan waddooyinka isku xira deegaannada Gobollada Baay iyo Shabeellaha Hoose.
Intii uu socday howlgalka, Ciidanka Danab ayaa sidoo kale gacanta ku dhigay xubno ka tirsan shabakad ku howlanayd abaabulka iyo diyaarinta qaraxyada, kuwaas oo qorshahoodu ahaa in ay waxyeello u geystaan shacabka Soomaaliyeed iyo dadka isticmaala waddooyinka.
Howlgalladan ayaa door muhiim ah ka qaata xogaha iyo warbixinnada ay shacabka la wadaagaan Ciidanka Kumaandooska Danab. Xogaha ay bulshada soo gudbiyaan ayaa Ciidanka ka caawiya in ay si hufan uga hortagaan falalka Al-Shabaab, loogana hortago qorshayaasha lagu waxyeelleynayo shacabka iyo dadka isticmaala waddooyinka.
