Jowhar – Taliyaha Qaybta 5-aad ee Hawlgalka Midowga Afrika ee Taageerada iyo Xasilinta Soomaaliya (AUSSOM), Sarreeye Guuto Michel Ndenzako, ayaa Jimcihii kormeer ku tagay xarumo muhiim ah oo ku yaalla Garoonka Diyaaradaha Jowhar, si uu u qiimeeyo xaaladda amniga una xoojiyo tallaabooyinka lagu ilaalinayo ciidamada iyo kaabayaasha muhiimka ah.
Taliyaha ayaa booqday xarumaha muhiimka ah ee Xarunta Dhexe ee Qaybta 5-aad, isagoo faray in dayactir lagu sameeyo godadka difaaca ee ku teedsan dhabbaha ay diyaaradaha ku ordaan, si loo adkeeyo amniga darbiyada garoonka loona xaqiijiyo badqabka hawlgallada.
Sarreeye Guuto Ndenzako ayaa sidoo kale amray in la xoojiyo kormeerka amniga, kor loo qaado awoodda jawaab-celinta degdegga ah, isla markaana si gaar ah loo ilaaliyo kaabayaasha xasaasiga ah ee garoonka.
Isagoo la hadlay ciidamada ku sugan halkaasi, Taliyaha ayaa ku boorriyay inay muujiyaan feejignaan iyo diyaargarow hawlgaleed oo joogto ah, si looga hortago khataraha ka imanaya Al-Shabaab iyo kooxaha kale ee hubeysan. Kormeerkan ayaa qeyb ka ah dadaallada ay Qaybta 5-aad ee AUSSOM ku xoojinayso amniga ciidamada, ilaalinta xarumaha muhiimka ah iyo xaqiijinta jawi amni oo suurtageliya in hawlgallada taageeraya nabadda iyo xasilloonida Soomaaliya ay si hufan u socdaan.
