WASHINGTON — Madaxweynaha Mareykanka Donald Trump ayaa ku hanjabay in “xadaarad dhan ay caawa dhiman doonto” haddii aan heshiis lala gaarin Iran isla markaana aan dib loo furin marin-biyoodka Hormuz ka hor waqtiga kama dambaysta ah ee 8-da fiidnimo waqtiga Bariga Mareykanka (ET).
Hanjabaaddan ayaa ah tii ugu dambeysay ee Trump ka hor waqtiga uu u qabtay Iran, iyadoo xiisadda ka taagan marin-biyoodka muhiimka ah ee dhoofinta tamarta ay sii kordhayso. Khubarada sharciga caalamiga ah ee bini’aadantinimada iyo saraakiil hore ayaa hore u sheegay in hanjabaadaha ka dhanka ah kaabayaasha rayidka ay keeni karaan eedeymo la xiriira dembiyo dagaal.
Si kastaba, Iran ayaa weli diidan shuruudaha la soo jeediyay. Islamic Revolutionary Guard Corps (Ilaalada Kacaanka Iran) ayaa ka digay in haddii Trump uu fuliyo hanjabaadiisa, ay “Mareykanka iyo xulafadiisa ka xayuubin doonaan saliidda iyo gaasta gobolka muddo sanado ah.”
Saraakiisha Iran ayaa sidoo kale ugu baaqay dhalinyarada inay sameeyaan silsilado bini’aadan si ay u ilaaliyaan xarumaha korontada iyo kaabayaasha kale ee muhiimka ah, iyadoo laga cabsi qabo weerarro suuragal ah.
Xiisadda ka taagan marin-biyoodka Hormuz — oo ah marin muhiim u ah gaadiidka saliidda caalamka — ayaa sare u qaaday walaaca ku saabsan saameyn ballaaran oo ku timaadda dhaqaalaha iyo amniga gobolka.
