Asmara — Dowladda Eritrea ayaa Qaramada Midoobay ka codsatay inay soo farageliso xiisadda sii xoogeysanaysa ee kala dhaxaysa Itoobiya, iyadoo labada dal ay isku eedeynayaan inay hurinayaan dagaal cusub oo ka qarxa gobolka Geeska Afrika.
Eritrea ayaa Golaha Ammaanka ee Qaramada Midoobay ka dalbatay inuu qaado “tallaabooyin lagu horjoogsanayo xaaladda”, kadib markii ay sheegtay in Itoobiya ay ku dhawaaqday dagaal ka dhan ah, arrintaas oo kusoo beegmaysa xiisadda sii kordheysa ee ka taagan gobolka Tigray ee waqooyiga Itoobiya.
Codsiga Eritrea ayaa yimid maalin kadib markii dowladda Itoobiya ay warqad u dirtay Golaha Ammaanka, kuna eedeysay ciidamada Eritrea inay gudaha u galeen dhulka Itoobiya, gaar ahaan gobolka Tigray, masaafo lagu sheegay 60 kiiloomitir.
Addis Ababa ayaa sidoo kale Asmara ku eedeysay inay taageerto jabhadda Xoreynta Dadka Tigreega (TPLF), iyadoo sheegtay in dhaqdhaqaaqyada ciidamada Eritrea ay qeyb ka yihiin faragelin amni oo ka dhan ah Itoobiya.
Hase yeeshee, dowladda Eritrea ayaa eedeymahaas ku tilmaantay kuwo aan sal iyo raad lahayn, iyadoo ku dooday in Itoobiya ay isku dayayso inay abuurto marmarsiinyo ay ku bilowdo dagaal gardarro ah.
Wasiirka Arrimaha Dibadda Eritrea, Cusmaan Saalax, ayaa warqad uu Sabtidii u diray Golaha Ammaanka ku sheegay in dalkiisu doonayo in Qaramada Midoobay ay si cad uga hortimaaddo waxa uu ku tilmaamay ku dhawaaqista dagaal ee Itoobiya.
Saalax ayaa Golaha Ammaanka ka codsaday inuu cambaareeyo tallaabooyinka Itoobiya, isla markaana uu qaado tallaabooyinka lagama maarmaanka ah si looga hortago in xaaladdu isu beddesho dagaal ballaaran.
Wuxuu sidoo kale ku boorriyay Qaramada Midoobay inay adeegsato Cutubka VII ee Axdiga Qaramada Midoobay, kaas oo Golaha Ammaanka siinaya awood uu ku qaado tallaabooyin lagu wajahayo khataraha nabadda iyo amniga caalamiga ah, kuwaas oo ay ku jiraan cunaqabatayn iyo, xaalado gaar ah, adeegsiga awood milatari.
Dowladda Eritrea ayaa ku adkeysanaysa in eedeymaha Itoobiya ee la xiriira gelitaanka ciidamada Eritrea ee gobolka Tigray ay yihiin isku day lagu sharciyeynayo tallaabooyin dagaal oo ka dhan ah dalkaas.
Dhanka kale, Wasiirka Warfaafinta Eritrea, Yemane Gebremeskel, ayaa Jimcihii Itoobiya ku eedeeyay inay waddo gardarro ka dhan ah Eritrea, isagoo arrintaas la xiriiriyay dalabka Addis Ababa ee ah inay hesho marin toos ah oo ay ku gaarto Badda Cas.
Gebremeskel, oo qoraal ku baahiyay barta X, si cad uma xaqiijin mana uusan beenin wararka sheegaya in ciidamada Eritrea ay ka gudbeen xuduudda labada dal.
Xiisadda labada dal ayaa sii xoogeysatay kadib markii isbahaysi ka kooban toddobo kooxood oo hubaysan uu weerarro ka dhan ah ciidamada federaalka Itoobiya ka fuliyay gobolka Tigray bishii hore, isagoo sheegay inuu doonayo inuu meesha ka saaro dowladda Ra’iisul Wasaare Abiy Axmed.
Dowladda Itoobiya ayaa Eritrea ku eedeysay inay taageerto xoogagga hubaysan ee ka dagaallamaya gobolka, gaar ahaan TPLF, oo hore dagaal culus ula gashay dowladda federaalka.
