Muqdisho — Dowladda Uganda ayaa ciidamo cusub u soo dirtay Soomaaliya, kuwaas oo ka tirsan Hawlgalka Midowga Afrika ee Taageerada iyo Xasilinta Soomaaliya (AUSSOM), iyadoo guutada 48-aad ay beddelayso guutadii 45-aad ee horey uga howlgallaysay dalka.
Sida lagu sheegay warbixin kasoo baxday Ciidanka Difaaca Dadweynaha Uganda (UPDF), guutada cusub waxaa hoggaaminaya Korneel Michael Opio Ocuka, waxaana ciidamada loo diyaariyay inay ka qeyb qaataan howlaha amniga iyo xasilinta Soomaaliya.
Sarreeye Guuto Jackson Kayanja, oo ah taliyaha Qaybta Koowaad ee ciidamada Uganda, ayaa ciidamada cusub kula dardaarmay inay ilaaliyaan anshaxa, xirfadda iyo feejignaanta inta ay ku guda jiraan waajibaadkooda Soomaaliya. Kayanja ayaa sidoo kale carrabka ku adkeeyay muhiimadda ay leedahay in ciidamada ay ixtiraamaan silsiladda taliska, ilaaliyaan midnimada, isla markaana si buuxda u gutaan mas’uuliyadaha loo igmaday.
Wuxuu intaas ku daray in iskaashiga ciidamada iyo ka hortagga joogtada ah ee khataraha Al-Shabaab ay muhiim u yihiin howlaha amniga ee ay ka wadaan Soomaaliya. Dhankiisa, Ku-xigeenka Taliyaha Qaybta Koowaad, Korneel Jude Rukubya, ayaa ciidamada cusub ku boorriyay inay la qabsadaan xaaladaha amni ee Soomaaliya, isla markaana ay khibrad ka bartaan ciidamada kale ee ka howlgala howlgalka si loo xoojiyo wada-shaqeynta iyo waxqabadka ciidamada.
Saraakiisha Uganda ayaa sidoo kale adkeeyay muhiimadda ay leedahay iskaashiga dalalka Afrika iyo fahamka waajibaadka AUSSOM, oo taageera dadaallada lagu xoojinayo amniga iyo xasilloonida Soomaaliya. Isbeddelka guutooyinka Uganda ayaa qeyb ka ah habka wareejinta ciidamada ee howlgalka, iyadoo ciidamada ka socda dalalka Midowga Afrika ay taageeraan dadaallada amni ee Soomaaliya. Warbixinta UPDF laguma sheegin tirada askarta ku jirta guutada 48-aad iyo goobaha gaarka ah ee ay ka howlgeli doonaan Soomaaliya.
